We travel not to escape life, but for life not to escape us.

Ohh mann scho sooo lang kein Itrag me gmacht! Han fast chli es schlechts Gwüsse...

Han mer ja eigentlich vorgno jedi Wuche min. 1 Itrag zmache aber ebe han halt sehr vil um dOhre gha :P

Sit ich in Palm Beach gsi bin isch so vil los gsi.

Also ich fange mal a mit de Shell Beach eis Weekend nach Palm Beach. Es hätti det eigentlich en Party selle stattfinde mit 1400 Lüt. Voller Vorfreud sind Kim und ich scho chli früehner ad Shelly Beach gange und hend gwartet bis dlüt itrudlet. S'einzige womer gseh hend sind 14 jährigi Teenies wo gmeint hend sie münd au det debi si. Schlussendlich hed denn de wo die Party uf Facebook ta hed sie abgseit well Polizei det gsi isch und das sehrwarschindli seeehr eskaliert wer. Es isch aber trotzdem lustig gsi det a de Shelly well mer Polizei no in Action gseh hend wo sie grad eine festgno hend.

Dwuche druf hani endlich mal a dem Schwumm trilgno vo Manly Beach nach Shelly Beach sind 1500m hi und zrug. Bin jetzt bi dene im Club und han en Badkappe becho vo dene :)

Denn simmer no einisch mit de Klass go Pizza esse well mer 2 neue Schüelerinne becho hend natürli vo de Schwitz vo wo au schuscht.... -.- Es

S'Wetter wird jetzt immer wärmer und mer sind jetzt halt recht vil a de Shelly und mached BBQ's det mit de Brasilianer die chönd vil besser grilliere als eusi Schwitzer hahah :P

Vorletscht Weekend hani mer en Kamera kauft woni nacher chan mitne zum reise. Han mega freud a de Kamera sie macht so gueti Fotos. Ab jetzt wird also Qualität vo mine Bilder besser si :D.

Letscht Weekend bini imene Surfcamp gsi, leider ohni Kim weg ihrem Knüü. Sie hed ebe letscht Februar die letscht OP gha weg ihrem Krützband :( s'Surfcamp isch super gsi!! Bin zwar di ganz Zit mitem Fabio, Tim und em Jakub unterwegs gsi aber das hed passt so :)

Surfe isch glaub de schwirigsti Sport woni jemals probiert han und all wo mich kenned wüssed jetzt dass es würkli schwirig muss si wenn ich das sege well ich han glaub jede mögliche Sport schomal usprobiert.

Surfcamp isch in Bendalong gsi vom Fritig bis Sunntig abig. Das isch ca. 4h entfernt vo Manly. Mer hend det im Nationalpark ufeme Camp gschlafe i Zelt. Ich han es Zelt mitem Röbi teilt. Es isch aber aaaarschchalt gsi i de Nacht mussi scho zuege. Uf eusem Camping heds usserdem Kangoros gha hend es Selfie gschafft zmache aber hed seeeehr lang duret.

Am Fritig am 4i simmer abgfahre und sind ca. am 9i in Bendalong gsi wells sovil Stau gha hed us Sydney use. Womer denn uf eusem Camp gsi sind hemmer Znacht becho und sind ca. am 1 is Bett. Denn Am Samstig simmer am 7ni ufgstande zmroge gesse und die ersti Gruppe isch grad nachem Zmorge go surfe. Ich bin mitem Tim, Fabio und Jakub i de Gruppe 2 gsi mit no andere vonere andere Sprachschuel. Mer sind ca. am 9i anen Beach gange i de nöchi vom Camo go Stachelroche füetere. Han denkt jetzt gsemmer so chlini Röcheli aber die Teilers sind sicher öppe 1 Meter breit gsi :OO. han sie ned traut füetere aber han gfilmt mit de Gopro. ;)

Nacher vorem Mittag ca. am 10ni sind denn mer dragsi mit surfe.

Wie gseit isches mega schwirig gsi aber hans wenigstens gschafft ufzstah. Am Nami simmer denn nomal go surfe.

Am Abig hemmer es Für gmacht am Meer und sind halt eifach chli ghöcklet, hend Musik glost und chli Cider trunke :) (Cider = Öpfelbier, ganz wichtig nur für Fraue)

Jetzt no zum Sunntig. De Morge isch eigentlich weder glich abgloffe ussert dass ich am Namitag nümme go surfe bin weli so totmüed gsi bin. Han denn eifach am Strand chli gsünnelet. Oh hani vergesse schribe am Samstig hemmer Kangoro Burger gha zum Zmittag, hani mega gern gha schmöckt wie Rindfleisch :)

So und jetzt isch schoweder Zischtig. Hüt hani mis Halloween Kostüm kauft.

Fotos folged denn no vom Kostüm.

Bis bald.

xoxo

Laura