Happy New Year

Soo han endlich weder min Laptop und chan weder Iträg mache nach 2 Wuche.

Bin vom 13. - 28. Dezember unterwegs gsi vo Melbourne nach Alice Springs.

Am Dunstig de 10. Dezember hani es Mail becho dass euse Flug cancelled worde isch...

Fangt ja scho guet a hani denkt aber hend zum Glück chönne umbueche .

In Melbourne acho simmer grad vom FLughafe is Backpacker (Greenhouse Backpacker Melbourne) isch super glege und au suber und völlig okay.

In Melbourne simmer denn am erste Tag in Botanische Garte go umelaufe und am 2. Tag simmer en Stadtrundfahrt go mache.

Bald sind au de Tim und de Tobias in Melbourne gsi hemmer denkt gömmer doch is Vapiano go esse.

Im Grosse und Ganze findi Melbourne mega en cooli Stadt es isch so "urban".

Zistig de 15. Dezember

Da isches denn losgange mit de erste Tour mit Groovy Grape Tours vo Melbourne nach Adelaide.

Hend en super Gruppe gha mit ganz vil verschidene Lüt us de ganze Welt.

Also gstartet hed de Trip mit de Great Ocean Road denn simmer no inen Regewald gange (Great Otway National Park) De Sunneuntergang hemmer miteme Cider dörfe bi de Twelve Apostels gnüsse. Isch traumhaft schön gsi! :)

Am 2. Tag hemmer denn folgendes gmacht, sind am 5i ufgstande und zu verschidene Stops a de Great Ocean Road gfahre:

Shipwreck Coast, such as the Bay of Martyrs, London Bridge and Loch Ard Gorge.

Am Namitag simmer denn bi de Grampians aglangt. Das isch en Nationalpark mit vilne "Berge" bzw. Hügel womer guet chan wandere und klettere. Sind au no imne Wasserfall go bade.

Tag 3 simmer denn go "wandere" also zumne Ussichtspunkt gloffe. Hend en super Ussicht gha über dGrampians. Hed mer gfalle dete. Am Abig simmer denn im Backpacker in Adelaide gsi (Backpacker OZ) isch s'schlechtiste Backpacker gsi womer gha hend i dene 2.5 Wuche. Denn hemmer am Fritig ein Tag Rest gha und sind ad Beach gange (Glenelg) isch mega schön det hed ganz vil chlini Kafis a de Promenade.

Samstig de 19. Dezember

Da hed eusi Kangaroo Island Tour gstartet au mit Groovy Grape Tours. Sind am erste Tag an Seal Bay gange womer en gführti Tour gmacht hend zu de Seerobbe. Zuuu heiss gsi a dem Tag bin fast krepiert. Zum Glück hemmer am Namitag chli chönne im Meer go bade und go Kanu fahre. Sind amne super schöne Strand gsi de isch mal zum schönschte gwählt worde in Australie. Am Abig hemmer feins thailändisches Esse becho vo eusem Tourguide. Hed würkli super koched.

Am 2. Tag (20. Dezember)simmer denn gmüetlich chli go Sandboarde i de Düne. Für alli Lüt wo uuuumbedingt mal go Sandboarde wend... es isch würkli nüt speziells, di ganz zit hed mer Sand im Mul und i de Haare denn gheisch no di ganz zit mitem Kopf in Sand ine und ja chönd euch ja vorstelle wie motiviert ich gsi bin mit Sand im ganze Gsicht….

Mentig de 21. Dezember

Da de Fabio und ich sones Package buecht hend, hemmer no en gratis Wiitour i de Barossa Valleys becho. Mer hend 4 Wifarme bsuecht. Di Witour hed am 8.30 agfange hend aber zerst nochli müsse fahre also heds Witrinke erst am 10ni agfange. Folgendi Farme hemmer bsucht:

- Jacob’s Creek

- Kies

- Wolf Blass

- weissi nümme hahaha

Uf jede Fall isch das en super Tour gsi han mich chli wie in Südafrika gfühlt bi de Winetastings natürli sind die Wi da ned so guet wie die vo Südafrika... hihi

Zischtig de 22. Dezember

A dem Tag hed eusi 6 tägig Outback Tour gstartet. Insgesamt simmer 2'700km gfahre. De Fabio und ich hend det de Tim, Tobias und Remina (Tims Schwester) troffe. I dene 6 Täg hemmer so vil gseh ich weiss gar nümme alles.

Mer sind immer vil Autogfahre und jede Tag am Morge am 4i ufgstande und go laufe/wandere well nachem 8i isches zheiss gsi zum no go wandere welle. Euse Tourguide hed immer für eus koched. Meistens ischs fein gsi aber nachem 2. Tag hani sLamm langsam gseh... ich wo ja so en Lammesserin bin *Hust* ich hasse Lamm.

Womer bim Uluru gsi sind hemmer eimal de Sunneufgang gluegt und Pancakes dezue gesse. Aber isch en rise Stress gsi dass mer zvordest hend chönne hocke. Hends denn aber vor de andere Touris gschafft dete si ;)

Mini Wiehnachte sind gaaaar nüt speziells gsi. Han a dem Tag di 3. giftigsti Schlange gseh uf eusem Camp womer hend müsse ufem Bode schlafe... Die hed euse Tourguide denn aber tötet well die 130 Mensche chan kille mit 1 Biss. Bim Wiehnachtsznacht heds denn au no agfange regne i de Wüesti!? wos ja eigentlich nie regnet.

Womer denn endlich in Alice Springs acho sind und weder mal ufeme Bett hend chönne schlafe sind all froh und glücklich gsi. Am Abig simmer all zeme ines Restaurant go Znacht esse. Da mer (Fabio, Tim, Remia, Tobias und ich) am nechste Tag am 9i hend müsse uschecke simmer chli früehner hei gange als di andere. Mer sind denn heigloffe z5te. De Weg vom Resti hei isch ca. 7min gange. Womer usem Resti usegloffe sind hed de Fabio grad mal eini kassiert vomene Aborigine, de Weg wo mal 7min gange wer isch denn nur no 2min gsi well mer um euses Lebe hend müsse sekle :O

Am Nechste Morge simmer denn an Flughafe und zrug uf Sydney.

In Sydney simmer denn no vom 28. Dezember-3. Januar 2016 gsi.

Han ned vil gmacht chli d'Lüt troffe vo Manly und chli Sache erlediget vorem Reise. Neujahr hemmer denn im Luna Park in Sydney gfiret isch super gsi hend sFührwerk vo det guet gseh.

Denn isch bald mal de Tag cho womer uf Cairns gfloge sind am 3. Januar 2016. Da simmer jetzt bis am Dunstig morge. Morn gömmer zu de Milaa Milaa Falls mitem Auto. Am Mittwuch isch Great Barrier Reef a de Reihe freu mich so uf das. Denn am Dunstig morge gömmer Richtig Townsville.

Sind da in Cairns imne rise Backpacker hend 500 Lüt platz :O Gilligans heissts.

Halte euch ufem laufende ab jetzt chli besser versproche! hihi

xoxo

Laura